في الطيارة

في الطيارة

 

الحوار ده بين جو و البنت اللي جنبه في الطيارة  الألمانية اللي هتروح نيويورك  .جو متعود انه دايماً بيقعد في الطيارة جنب راجل تخين أو ست عجوزة  بس المرة دي مختلفة . دلوقتي قاعد جنب بنت زي القمر  في التلاتينات طويلة و شقرا .

جو: إيه ده غريبة .  أنا باسافر كتير أوي و دايمأ حظي وحش  في الكرسي اللي جنبي . بس تقريباً دي أول مرة أقعد جنب بنت حلوة كدة . ياه أكيد الرحلة دي هتكون عنب . ممكن أدردش مع البنت دي لحد ما أوصل.

جو: هاي ،أنا جو

البنت: هاي يا جو

جو : دي أول مرة ليكي لنيو يورك ( بلكنة بريطانية).

البنت: انت بريطاني ؟.أنا باحب لكنتكو أوي أجمل من الأمريكاني. يعني زي الفرق بين الأكل في مطعم شيك و الأكل في ماكدونالدز .

جو : أيوة أنا فعلا بريطاني أو نصي بريطاني .

البنت:نصك بريطاني؟! طيب و نصك التاني؟

جو : أنا .....

البنت :استنى  أنا هاخمن .

أسباني؟

جو : لأ ، حاولي مرة كمان.

البنت:إيطالي؟

جو : لأ ، يلا التالتة تابتة.

البنت : ممكن عربي؟

جو : مصري

البنت:ههههههههههههههههه بجد؟( ضحك  السنين)

جو : بتضحكي على إيه؟

البنت : أنا أسفة بس أنا باضحك عشان أنا كمان نصي مصري .

 ( بصرة).

جو :مش معقولة؟ انتي نصك مصري و أنا نصي مصري . نصك على نصي يبقى واحد كامل .(قلش مصري)

و نصك التاني إيه ؟

البنت :ألماني .

جو:ياه ده خليط هايل.النظام و الفوضى.

البنت:و دي مشكلة حياتي يعني في ألمانيا أنا مش منظمة زيهم و في مصر أنا جد أوي كإني في الجيش.

جو:انتي عايشة في مصر ولا ألمانيا؟

البنت: ما بين هنا و هناك .

جو : انتي بتعملي إيه ؟ بتدرسي ولا بتشتغلي؟

البنت: بص ، أنا باعشق مصر عشان كدة بادرس نص السنة في الجامعة الألمانية في مصر .و النص التاني في جامعة هامبورج.

وانت يا جو بتعمل إيه ؟

جو: أنا باشتغل في نيويورك في بنك . و في الأجازة بارجع مصر عشان أعيش شوية بعيد عن النظام . والله ساعات الفوضى بتكون لذيذة برضه .

البنت: عندك حق بس مش ممكن مع المرور .أكبر مشكلة في مصر الزحمة . عربيات و ناس فوق بعض في كل مكان . و العربيات بتزمر بسبب و من غير سبب.

جو:أه فعلاً و أكيد جوزك ما بيعرفش يسوق في مصر ؟!( سؤال لئيم).

البنت : لأ ، أنا مش متجوزة .

جو: إزاي بس ، إيه اللي حصل لرجالة مصر و ألمانيا . إزاي يسيبو الجمال ده؟

البنت : دي معاكسة؟؟

جو: أنا أسف ما أقصدش أسأل أسئلة شخصية.

البنت : عادي ، مافيش مشكلة .( ده سؤال من  نصك المصري) .

بس الراجل المصري بيرفض نصي الألماني و الراجل الألماني بيرفض نصي المصري .

جو:مش فاهم .  دي فزورة ؟

البنت : الراجل الألماني بيشوف اني بنت صعبة أوي و هو عايزني أكون حرة أكتر من كده . و الراجل المصري بقى أغلب الوقت بيشوفني سهلة أوي و طبعاً ده مش مقبول . يعني ممكن صحاب بس مش ممكن جواز .

 

و على فكرة نصي المصري كمان بيرفض الراجل الألماني .

جو : يعني إيه؟

البنت :الراجل الألماني جد زياده عن اللزوم و أنا مش كده خالص .  وانت معاك عيلتك ؟ ( نفس اللؤم).

جو :شوفي يا ستي .أنا كنت متجوز و دلوقتي بخ بس عندي ابن واحد عايش مع أمه و باشوفه كل فين و فين . ( مافيش حاجة اسمها إمتى و إمتى)

البنت: هي انجليزية ؟

جو: لأ مصرية بس  اتجوزتني عشان أنا بريطاني و بعدين كان عندها مشكلة مع نصي المصري . يعني كنت راجل صعب و بارفض حاجات كتير وانتي فاهمة الباقي بقى .

البنت : أه فاهمة بس على الأقل انت عندك ابن دلوقتي ممكن يساعدك و يهتم بيك لما تكبر بس أنا..... ....  

جو: إن شاء الله هتقابلي الراجل اللي يفهمك و يحترم ثقافتك أو ثقافتينك .

البنت :صعب بس  يسمع من بقك ربنا .

جو:أه صحيح نسيت أسألك عن اسمك.

البنت: سارة .

جو: اسم جميل ينفع عربي و أوروبي .

فرصة سعيده

سارة:أنا أسعد.

Uppsala University 2015 program